ترکیہ میں سیلاب کی تباہ کاری: وزیراعظم شہباز شریف کا صدر ایردوان سے اظہار تعزیت، ہر ممکن مدد کی پیشکش

 اسلام آباد: وزیراعظم شہباز شریف نے ترکیہ میں آنے والے تباہ کن سیلاب اور خراب موسم کی وجہ سے ہونے والے جانی و مالی نقصان پر گہرے رنج و غم کا اظہار کیا ہے۔ وزیراعظم نے ترک صدر رجب طیب ایردوان اور وہاں کے عوام سے دلی تعزیت کی ہے۔

سوشل میڈیا پر جاری اپنے ایک بیان میں وزیراعظم نے کہا کہ وہ پاکستان کی حکومت اور عوام کی جانب سے اپنے ترک بھائیوں کے دکھ میں برابر کے شریک ہیں۔ انہوں نے ذکر کیا کہ سیلاب اور شدید موسم نے ترکیہ کے مختلف صوبوں بشمول غازی انٹیپ، شانلی اورفا اور ادیامان میں شدید تباہی مچائی ہے جس کے نتیجے میں قیمتی جانیں ضائع ہوئی ہیں اور املاک کو نقصان پہنچا ہے۔

On behalf of the people and Government of Pakistan, as well as on my own behalf, I wish to extend our heartfelt condolences to my dear brother H.E. Recep Tayyip Erdoğan and to the brotherly people of Türkiye, on the devastating floods and extreme weather disturbances, that have…

— Shehbaz Sharif (@CMShehbaz) May 5, 2026

وزیراعظم نے ترکیہ کے ساتھ مکمل یکجہتی کا اظہار کرتے ہوئے کہا کہ اس مشکل گھڑی میں پاکستان اپنے ترک بھائیوں اور بہنوں کے ساتھ کھڑا ہے۔ ہماری ہمدردیاں اور دعائیں متاثرہ خاندانوں اور اس قدرتی آفت کا شکار ہونے والے تمام افراد کے ساتھ ہیں۔

شہباز شریف نے مزید یقین دہانی کرائی کہ پاکستان ترکیہ کی امدادی سرگرمیوں میں ہر قسم کی انسانی اور مادی مدد فراہم کرنے کے لیے تیار ہے۔ انہوں نے کہا کہ ترکیہ کو جب بھی اور جس قسم کی بھی ضرورت ہوگی، پاکستان اپنے بھائیوں کی پکار پر لبیک کہے گا۔